規律

 

IMG_9159

以一定的速度,從一點前往另一點;完成一項工作後離開,前往下一點;如果途中遇到突發的事情,暫停移動處理,然後下決定。

上述描述適用於 Pokemon Go,也適用於描述人類的日常活動,從家移動至超市,購買所需物品;遇見減價優惠,停下來看看,判定是否需要,然後決定購買還是離開。

一邊玩 Pokemon Go,腦海裏不期然記起倪匡的經典小說——《規律》:

「康納士博士是高級知識份子,他一直以為自己,或是人類,是地球的主宰,可以憑人類的努力,做出任何事來,但忽然之間,他發現所謂萬物之靈,和昆蟲沒有甚麼不同,試想,他如何還會有興趣活下去?」

《規律》,倪匡,1972

當自己投入 Pokemon Go,打開應用跑步、搭車,電話稍有震動便拿起來看看有沒有精靈出現,忽然想起小說那一段。如果服務供應商忽發奇想,在地圖上以線條繪畫出玩家的軌跡會怎樣呢?是會看見玩家像螞蟻一樣圍著一個範圍打轉,還是看見重複的線條,敘述着玩家枯燥乏味的生活?

既然玩家只是重複這個規律,何必浪費自己的時間去進行遊戲?因此外國開始有團隊利用 API 造出自動步行捕捉器,脫離遊戲的控制。與其花時間重複這些機械性的動作,不如多花時間在創作活動,繪畫、攝影、寫抒情文章(對,新聞報導都是 bot 可以取代的)、寫 App,甚至將 Pokemon Go 當 Pokemon Snap 玩,最少這暫時是人可以,而機械人未能做的事。

(又,再潑冷水,倪匡還有另外兩本經典小說——《圈套》、《玩具》,描述當「玩具」以為脫離了操控者的控制,實際上那個逃脫過程只是操控者另一種遊玩方式。)

從元祖遊戲玩家角度講吓 Pokémon Go

IMG_8807.PNG

先此聲明,呢篇文唔講技術唔講科技,呢兩樣嘢太多人講,我睇到厭。我只係想站在元祖玩家角度講吓隻 Game 點解咁成功咁有 noise。(另外我手打我心,廣東話!支持粵典港語學

我係 1996 年入坑嘅玩家,為咗 Pokémon 買過 Gameboy、Gameboy Color、Gameboy Advance、NDS(銀灰色)、DS Lite、3DS(多部),從 GBA 開始每一代都買曬所有版本玩;動畫仲追緊,知道小智終於有機會響 Kalos Region 拎亞軍好開心。

有篇文章話 Niantic 個老總 20 年磨一劍,響技術層面令 Pokémon Go 得以誕生;但對 Pokémon 嚟講又何嘗唔係用 20 年嚟磨呢把劍?

1996 年推出至今 20 年,Pokémon 除了攻陷過日本市場,更成功搶佔歐美市場,令 Pokémon 成為一個屬於世界嘅回憶。假設當年小一已經開始打 Gameboy 版,嗰個細路今日 26 歲;當小六開始打,今日就 31 歲(唔計中學生啦,自己計啦)。籠統啲計,呢班友今日個 age range 係 25 – 40 歲,代表乜?代表當年玩過嘅玩家,甚至 Fans 都踏入消費力最旺盛嘅時候——大學畢業,開始返工,買樓遙遙無期,更重要係未生仔(就算有都得一件),佢哋可以算得上最無聊、最肯洗錢尋找童年回憶,又因為已經轉過珠射過彈珠等,好樂意去課金畀錢。Pokémon 嘅遊戲、動畫、漫畫,可以話代表咗佢哋童年嘅一部份,而呢個時候梗係要引用呢一句:「回憶係無價嘅」(呢個時候一定要出呢張圖)。

Screen Shot 2016-07-17 at 9.46.39 AM.png

既然「回憶係無價嘅」,咁依家又一隻 Game 主打「回憶」,仲話基本 Play 「無價(免費)」,咁你玩唔玩?玩!搞掂。除咗有呢班老玩家,miss 咗元祖版唔緊要,你仲有金銀、寶石、黑白(Best Wishes)、XYZ 入坑嗰班後生,佢哋玩唔玩?玩!咁老人家點?好簡單,你個仔玩,你個孫玩,你玩唔玩?我諗好多人都會答:「玩!」全年齡層攻略完成!

Screen Shot 2016-07-17 at 10.09.54 AM

講完年齡層,講吓精靈。Pokémon Go 可以話回歸 Pokémon 原點,用 151 隻精靈做賣點。作為第一代開始玩嘅玩家,好多人有時都耿耿於懷話:「新精靈越嚟越醜。」量化呢個 statement 可以話「自寶石版開始新精靈嘅菱角多咗、冇咁似生物」,我諗唔少老玩家都會揀返自己熟悉、喜歡嘅精靈嚟用。Pokémon Go 開始時只係出元祖精靈,除咗方便管理外亦可以畀元祖 Fans 尋找他們的回憶。用元祖嚟 Mark 住班老人家,又可以將元祖帶畀新一代,何樂而不為?

Screen Shot 2016-07-17 at 10.11.34 AM

另外適逢今年係 Pokémon 20 週年,任天堂亦重新推出元祖版復刻畀人 Download。老玩家可以買嚟尋找回憶,新玩家亦可以睇到呢個遊戲嘅進化。回憶又好,貪平買嚟捉返啲舊精靈都好,接觸過元祖系列精靈,再用一個全新方式響現實世界同精靈互動,當然有吸引力。

Screen Shot 2016-07-17 at 10.23.07 AM

外國玩家打扮成 Pokemon Go 主角玩 Pokemon Go (Livedoor 新聞圖片

最後講吓人物設計,Pokémon Go 嘅男女主同遊戲機嘅設定係唔同,遊戲機設定大概就同動畫一樣係小智咁大概 10 歲,但係 Pokémon Go 嘅主角年齡睇嚟似 18 – 22 的青年男女。對 26 – 40 呢代玩家嚟講,18 – 22 呢個年齡設定代表青春、活力,係自己最無憂嘅時候;對 6 – 15 歲細路,18 歲則係大人嘅象徵,亦係成長嘅憧憬,無論對邊一代人嚟講都會有投入感。至於角色套衫設計得好 Sporty,時尚但不失樸實,可愛得嚟又少少性感(或型仔),設計唔花巧好似日常運動裝,要搵亦唔難,因此令人更加容易投入遊戲,甚至開始 Cosplay,Cosplay 住嚟打機?

總而言之,呢隻 Game 肯定會爆,現在只希望香港早日可以玩到。

注:全篇文我冇講過比卡超三隻字真係好叻!又,我係特登唔寫《精靈寶可夢》,響「注」到寫方便畀 Google index 咁啦

講兩句:Monster Hunter 4

係,我知隻 Game 9月12日已經偷跑,計落都賣咗接近一個月,今日先講好似遲咗少少,不過唔講唔安樂,等我都講兩句啦⋯⋯

Monster Hunter 4: Special

我 9 月 13 日出機,之後基本上日日打、晼晚打⋯⋯今次 Monster Hunter 終於唔係淨係接任務打打打,而係有劇情,有故事,講吓獵團點樣周遊列國,救急扶危,解開世界謎團。整個遊戲有這個主題連貫,正!

另外,一反以往生態影片得隻怪,今次每段生態影片都會睇到主角⋯⋯更重要嘅係段片係根據主角唔係求其着套衫,而係着住辛苦打返嚟、砌出嚟嘅衫,非常親切。問題就係一開始創造角色時,唔可以再亂揀,因為一揀錯個樣就要以後都對住佢 >< 總之為咗睇片見到個靚樣,就要努力整靚衫,仲要整啲一定見到樣嘅衫!

怪物難度方面,好老實我一個由 MHP3 先開始完嘅人無乜可以講,惟一感覺係比 MHP3 同 MH3G 都難玩咗好多!而且今集新增嘅狂龍病毒,可以令已經又癲又大力嘅怪更癲更大力⋯⋯緊張又刺激⋯⋯正!

高低差作戰非常流暢,感覺令成個獵人嘅動作更靈活,更自然。而且加入高低跳躍後又為遊戲加入咗新玩法,都真係好正⋯⋯

劇透就唔會啦,不過 6 日之後就會打返陣 Pocket Monster X & Y (冇錯,係兩版都打!)⋯⋯寵物小精靈紅/綠推出後 17 年,遊戲系統終於從 2D 轉變為 3D⋯⋯好老實,我再次極度期待玩 Pocket Monster,比 Monster Hunter 4 更甚!Gotta catch’em all!