想太多,說太多

最近睇新聞睇 Facebook,撈埋 Comment 嚟睇,發現啲人諗嘢幾好笑。

有啲人咩都諗埋一邊,咩都上綱上線,同性戀就諗到自己想做嘅人獸交、聽地下音樂就諗到濫藥、性愛派對(地下音樂其實只係獨立樂隊囉好唔好)、夜歸就諗到啲人去蒲(凌晨 12 點被搶電話,有幾夜?IKEA 都收 11 點啦,有啲食肆收得仲夜)。

又,早排去香港文化博物館個羅浮宮展,人多就唔在講,但參觀嘅人七嘴八舌,以為見多識廣咁同自己嘅小朋友或者老婆講話,全程好似聲音導航咁。最難頂嘅係講還講,啲料仲要流嘅!咪話唔難頂。

anthony_van_dyck_saint_sebastian_martyrdom

好似上面呢張  Anthony van Dyck 嘅 Saint Sebastian Bound for Martyrdom,有家長看圖說故事就同個細路講:「後面嗰個男人用啲箭插死佢!」哇!用箭插死佢邊夠力,係都係用箭射死佢啦!(更何況 St Sebastian 畀箭射到刺猬咁都死唔去。)又,睇到一張張掛毯,又有好多聲音導航不斷話:「張掛地毯好靚吖!」「掛毯」就「掛毯」,點解會變咗「掛地毯」?

最嘔血嘅係欣賞 Dead of Nes-min 嘅時候,竟然有人大大聲話:「埃及嗰啲文字係象形文字嚟,啲魚蝦蟹嘅符號就代表咗佢哋想講嘅嘢。」好心啦,埃及聖書體(Hieroglyphs)表形、表音、表意都有,要學真係仲有 Course 可以讀。盲毛睇到一堆魚蝦蟹,就好似老外睇到啲中國字就當象形文字,然後自作聰明咁去解釋一樣。

少啲想當然,少啲講無謂嘢,多啲去睇吓啲有系統嘅研究,對成個社會都有啲益處。

Advertisements